Telekommunikatsiya injiniringi

Kafedra mudiri:

t.f.n., dotsent, Eshmuradov Abdimurod Mengtashevich

Qabul vaqti: Seshanba, Payshanba 15:00 dan 16:00 gacha
Telefon: (0 371) 238-65-56

TATU rektorining 2013 yil 29 avgustdagi 905-sonli buyrug‘iga asosan sobiq "Telekommunikatsiya tarmoqlari va kommutatsiya tizimlari” va "Telekommunikatsiya uzatish tizimlari” kafedralari bazasida "Telekommunikatsiya injiniringi” kafedrasi tashkil etildi. T.f.n. dotsent A.M.Eshmuradov esa kafedra mudiri lavozimiga tayinlandi. Hozirgi vaqtda yangi tashkil etilgan kafedrada jami 19 nafar professor-o‘qituvchilar faoliyat yuritmoqda. Shulardan: 1 nafar fan nomzodi, professor; 5 nafar fan nomzodlari, 6 nafar dotsentlar; 4 nafar katta o‘qituvchi hamda 8 nafar assistent o‘qituvchilardir.

"Telekommunikatsiya tarmoqlari va kommutatsiya tizimlari” kafedrasi tarixi

Telekommunikatsiya tarmoqlari va kommutatsiya tizimlari” kafedrasi universitetimizning "qaldirg‘och” mutaxassislik kafedrasi bo‘lib, u 1957 yilda tashkil qilingan va avval "Telefon aloqasi” kafedrasi deb, so‘ngra 1964-1998 yillar davomida"Avtomatik elektr aloqasi” kafedrasi, 1998-2013 yillar davomida "Telekommunikatsiya tarmoqlari va kommutatsiya tizimlari” nomi bilan faoliyat olib bordi. Unga birinchi kafedra mudiri qilib V.Ye.Korotkevich tayinlangan edi. Dastlabki yillarda kafedrada "Telefon aloqasi”,"Telegraf aloqasi” va "Aloqa korxonalarining elektr ta’minoti”fanlaridan mashg‘ulotlar olib borilgan.

Bu yillar davomida kafedraga turdosh elektrotexnika aloqa institutlari kafedralari katta uslubiy yordam ko‘rsatishgan. Bu ishda ayniqsa Leningrad elektrotexnika aloqa institutining telefoniya kafedrasi dotsenti, davlat mukofot laureati N.V. Zapletinning xizmatini alohida e’tirof etish kerak.U birinchi talabalikka qabul qilingan yoshlarga "Telefoniya” fani bo‘yicha ma’ruza va amaliyot mashg‘ulotlarini o‘tkazgan, shuningdek o‘quv laboratoriyalarini tashkil etish va jihozlashda faol ishtirok etgan.

Kafedraga shuningdek Moskva, Leningrad va Odessa shaharlaridagi turdosh institutlarning professor-o‘qituvchilari – M.M.Jdanov, R.A.Avakov, O.N.Ivanova, Z.S.Kaxanova, V.N.Roginskiy, B.S.Livshits kabi professorlar o‘quv metodik ishlar va ilmiy ishlarni shakllantirish va yo‘lga qo‘yishda katta yordam berishgan.

1958-1959 o‘quv yilida kafedraga LEAI bitiruvchisi, texnika fanlari nomzodi, dotsent N.V.Reshetnikov kafedra mudiri etib tayinlandi. U bilan birga shu yillarda O‘zbekiston aloqa vazirligi xodimi V.K.Obidin, MEAI bitiruvchilari V.M.Son va L.V.Suslovlar ham shu kafedrada mehnat faoliyatlarini boshladilar.

Telekommunikatsiya tarmoqlari va kommutatsiya tizimlari” kafedrasida turli yillar davomida katta o‘qituvchi V.V.Semchenko, dotsentlar M.Sh.Zohidov, E.X.Allaev, professor V.M.Son va dotsent N.H.Gulto‘raevlar kafedra mudiri bo‘lib faoliyot yuritishgan.

Kafedra yosh o‘qituvchilari muntazam ravishda Sobiq Ittifoq aloqa institutlariga aspiranturada maqsadli o‘qishga yuborildilar. Ulardan birinchisi kafedrada diplom loyihasini himoya qilgan, Toshkent elektrotexnika aloqa institutini ikkinchi yili bitirgan mutaxassislardan biri M.Sh.Zohidov edi. U 1965 yilda Leningrad elektrotexnika aloqa institutining "Telefon aloqasi” kafedrasida nomzodlik dissertatsiyasini muvaffaqiyatli himoya qilib qaytdi va keyinchalik institutda "Avtomatik elektr aloqa”(AEA) fakulteti dekani, o‘quv ishlari bo‘yicha prorektor, so‘ngra Respublika aloqa vaziri o‘rinbosari lavozimlarida faol mehnat qildi. O‘tgan asrning 70-80 yillarida kafedraga nomzodlik dissertatsiyalarini himoya qilib qaytgan bir qator iqtidorli yosh mutaxassislar kelib qo‘shildilar. Bular qatorida dotsentlar E.X.Allaev, V.I.Suvorov, V.N.Sarev, N.S.Xodjaev, A.M.Eshmuradov, S.S.Parsiev, R.A.Sharipov, A.A.Adiyarov, R.P.Abduraxmonovlar bor edilar. 90-yillarda G.S.Kotlobulatova, A.A.Kurmishevalar nomzodlik dissertatsiyasini himoya qilib, pedagogika fanlari nomzodi ilmiy darajasini oldilar.

Professor V.M.Sonning "Parallel komutatsiya paketi” ishi 2003 yil AQShda ixtiro sifatida tan olindi va unga mualliflik guvohnomasi berildi. 2003-2004 yillarda kafedra o‘qituvchilari tomonidan AQSh da ingliz tilida 4 ta ilmiy maqola chop etildi.

Kafedra katta o‘qituvchisi S.A. Sadchikova 2012 yili (professor V.M.Son rahbarligida) «Модели и методы расчета широкополосных ассоциативных сетей коммутации» mavzuida nomzodlik dissertatsiyasini himoya qildi.

"Telekommunikatsiya uzatish tizimlari” kafedrasi tarixi

Telekommunikatsiya uzatish tizimlari”kafedrasi universitetning "qaldirg‘och” mutaxassislik kafedralaridan biri bo‘lib, u 1958 yilda tashkil etilgan va dastlab "Uzoq aloqa” kafedrasi deb yuritilgan. Kafedra 1964-1965 o‘quv yilidan boshlab "Ko‘p kanalli elektr aloqa”, 1998-1999 o‘quv yilidan boshlab esa "Telekommunikatsiya uzatish tizimlari” deb nomlandi.

Markaziy aloqa ilmiy-tadqiqot instituti katta ilmiy xodimi M.U.Polyak birinchi bosqich ko‘p kanalli elektr aloqa texnikasini yaratishda qatnashgan va Leningrad elektrotexnika aloqa instituti (LEAI) o‘qituvchisi texnika fanlari nomzodi, dotsent N. Tixomirovlar kafedraga birinchi o‘qituvchilar qilib yuborilgan edilar. Ular ko‘p kanalli aloqa apparaturalarining birinchi avlodini ishlab chiqishda ishtirok etdilar. Kafedrada aloqa texnikumi o‘qituvchilari va Respublika aloqa vazirligi yetakchi mutaxassislari mashg‘ulotlar olib bordilar. Bular safiga Moskva va Leningrad elektrotexnika aloqa institutlari (MEAI va LEAI) ni tugatib kelgan M.G. Vasileva, N.Ye.Suslovlar qo‘shildilar. "Telekommunikatsiya uzatish tizimlari” kafedrasiga birinchi mudir etib N.Ye.Suslov tayinlandi. Kafedrani 1962-1972 yillar davomida Leningraddagi "Dalnaya svyaz” korxonasining ilmiy xodimi lavozimida ishlagan va ko‘p kanalli signallarni zichlashtirish uskunalarini ishlab chiqishda ishtirok etgan, texnika fanlari nomzodi, dotsent A.P.Chernenko boshqardi.

1972 yili kafedraga t.f.n., dotsent I.R.Berganov mudir etib saylandi. Bir yildan so‘ng kafedraga fan nomzodlarini tayyorlash huquqi berildi. Kafedrada 1970 yillarning boshida nomzodlik dissertatsiyasini himoya qilib qaytgan X.A.Sharifova, aspiranturani tugatib qaytgan R.I.Isaev, B.K.Abidov, F.B.Kuzaxmetova, V.S.Smorshevskiylar ish boshladilar. Ular safiga Toshkent shahar telefon aloqasi stansiyasidan L.N.Torskaya kelib qo‘shildi. 70-yillarda kafedra o‘z ilmiy yo‘nalishini shakllantirdi. "Uzatish tizimlarining xizmat qilishga yaroqliligi va uni oshirish choralarini ishlab chiqish”, "Birlamchi aloqa tarmog‘ining texnik xizmatini avtomatlashtirish” mavzularida ilmiy tadqiqot ishlari olib borildi.

1975-1982 yillarda R.I.Isaev, M.N.Baxtiyorov, M.A.Akilxanova va V.S.Smorshevskiylar nomzodlik dissertatsiyalarini himoya qildilar.

1982 yilda kafedraga texnika fanlari nomzodi, dotsent H.A.Sharifova mudir etib saylandi.

1983yili katta o‘qituvchi R.I.Isaev rahbarligida aloqa sohasidagi oliy o‘quv yurtlar orasida birinchi bor 30 ta telefon kanaliga mo‘ljallangan tolali optik uzatish tizimi ishlab chiqildi, tayyorlandi va ishga tushirildi. Shu yili kvant generatorlari ixtirochilaridan biri, Nobel mukofoti laureati, SSSR FA akademigi A.M.Proxorov va SSSR FA muxbir a’zosi Ye.M.Dianovlar institutga tashrif buyurdilar. Ular kafedra laboratoriyasida bo‘lib va axborotni tolali optik tizimi orqali uzatish bo‘yicha laboratoriya ishlari bilan tanishib, bu ishlariga yuqori baho berdilar. 1984-yili R.I.Isaev birinchi bor ko‘p kanalli elektr aloqa fakulteti talabalariga "Optik tolali raqamli uzatish tizimlari” kursidan ma'ruza o‘qiy boshladi va uning rahbarligi ostida O‘rta Osiyo Respublikalari va Qozog‘istonda birinchi bo‘lib Toshkent shahri 34- va 41-ATS lari o‘rtasida 4 km li tolali optik aloqa liniyasi qurildi. 1989 yilda Tosh TTS va Zangiota tumani markazi o‘rtasida 16 km. uzunlikli xududiy tolali optik aloqa liniyasi qurilib, bu liniya orqali 120 ta telefon kanalini uzatish ishlari tashkil etildi. Institut o‘quv ishlab-chiqarish bazasida aloqa obyektlarini barqaror elektr energiyasi bilan ta’minlovchi 250 vattli gibrid quyosh-shamol tizimi ishlab chiqildi va qurildi. 1997-2004 yillarda 5 kVt.li, 10 kVt.li gibrid stansiyalar qurildi, 2014 yilda "O‘zbektelekom” AJ 40 dan ortiq obyektlarida quyosh elektrostansiyalari ishga tushirildi va 2010 yilda O‘zbekiston Respublikasi nomidan O‘zbekiston axborot texnologiyalari va kommunikatsiyalarni rivojlantirish Vazirligi orqali "Elektr aloqani rivojlantirish” Xalqaro konferensiyasida "Qishloq joylarda va ommaviy elektr tarmog‘idan uzoq joylarda joylashgan obyektlarni barqaror elektr energiya bilan ta’minlovchi quyosh-shamol-dizel generatorli elektrostansiya” nomli ulush qabul qilindi va 2015 yilda uni qurish ishlari olib borilmoqda.

O‘tgan asrning 80-yillari oxirlarida o‘z ilmiy izlanishlarini yakunlab, B.M. Maxkamjonov (dotsent R.I.Isaev rahbarligida) va S.N.Ursov nomzodlik dissertatsiyalarini himoya qildilar.

1991 yil sentabrdan 2005 yil yanvar oyigacha kafedra mudiri vazifasini yana dotsent I.R.Berganov bajardi.

1996 yili kafedra tomonidan Toshkent telegraf-telefon stansiyasida uning filiali tashkil etildi. Kafedra filiallariga turli yillar davomida t.f.n., dotsent M.Sh.Zaxidov, R.D. Sulaymonov, A.G. Voytsexovskiy, t.f.d., dotsent S.A.Agzamovlar mudirlik qildilar.

2002-yili kafedra aspiranti V.A.Chanishev (dotsent I.R.Berganov raxbarligida) nomzodlik dissertatsiyasini himoya qildi.

2005-2006 o‘quv yilidan boshlab kafedra qayta tashkil etilib, uning tarkibiga "Metrologiya, standartlashtirish va sertifikatlashtirish” kafedrasi a’zolari ham qo‘shildilar va kafedraga texnika fanlari nomzodi, dotsent R.I. Isaev mudir etib tayinlandi. 2005-2011 yillar davomida kafedra dastlab texnika fanlari nomzodlari, dotsentlar M.P.Parpiev, X.M.Xoshimov, katta o‘qituvchilar R.N.Radjapova, R.K.Atametov, G.J.Axmedova, L.P.Bыldina, U.N.Karimova, G.X.Mirazimova, N.A.Poletaeva, assistentlar D.X.Ibatova, N.A.Karimova, G.Q.Muratova, G.S.Raxmonova, Sh.A.To‘laganovalar tarkibida faoliyat ko‘rsatdi. 2006/2007 o‘quv yilidan boshlab, ular safiga kafedraga "Elektronika va sxemotexnika” kafedrasidan taklif qilingan f.-m.f.n., dotsent N.Yu.Yunusov qo‘shildi. 2009/2010 o‘quv yilida kafedra yana bir bor qayta tashkil etilib, uning tarkibiga "Aloqa liniyalari” kafedrasi a’zolari – dotsentlar B.Davletyarov, S.S.Sidiqov, katta o‘qituvchilar – S.N.Dudyuk, R.Z.Kamaliddinov, R.O‘.O‘ktamov, assistent O.X. Nushtaevalar ham qo‘shildilar.

Kafedra aspiranti J.D.Muqimov 2011 yili (t.f.n., dotsent R.I.Isaev rahbarligida) «Защита информации каналов телекоммуникационных систем передачи» mavzuida nomzodlik dissertatsiyasini yoqladi.

Kafedra mudiri R.I.Isaev va dotsent N.Yu.Yunusovlarning tashabbuslari va faol harakatlari natijasida kafedrada 2007/2008 o‘quv yilidan boshlab "5A522203 – Aloqa va axborotga ishlov berishning optik tizimlari” mutaxassisligi bo‘yicha magistratura ochildi. 2007/2008–2011/2012 o‘quv yillari davomida uni 44 ta magistrant muvaffaqiyat bilan tugatdi. 2012/2013-2013/2014 o‘quv yillari davomida "5A301803 – Axborot o‘lchov tizimlari” mutaxassisligi bo‘yicha 9 ta magistrant magistrlik dissertatsiyasini himoya qildi. Bugungi kunda ular Respublikamiz va horijiy mamlakatlarda telekommunikatsiya va axborotlashtirish sohalarida faoliyat ko‘rsatmoqdalar.

Shu yillar davomida kafedrada magistratura talabalari uchun "Optik aloqa nazariyasi”, "Axborotga optik ishlov berish usullari va vositalari”, "Optoelektron qurilmalar sxemotexnikasi”, "Telekommunikatsiya tizimlarining barqaror ishlashi nazariyasi”, "Patentshunoslik, litsenziyalash va sertifikatlashtirish” fanlari bo‘yicha ma’ruza, laboratoriya va amaliy mashg‘ulotlar olib borildi.

Kafedrada R.I.Isaev tashabbusi va rahbarligida "Optik aloqa asoslari” laboratoriyasi tashkil etilib, u optik aloqa tizimlarining aktiv va passiv elementlari xarakteristika va parametrlarini va mazkur tizim ish xususiyatlarini tadqiq etish imkonini beradigan zamonaviy laboratoriya qurilmalari bilan jihozlandi.

Bu ishlarning natijasi e’tiborga olinib, universitet Iliy kengashi qarori bilan R.I.Isaev kafedra professori lavozimiga, R.N.Radjapova dotsent lavozimiga o‘tkazildi.

2011-2013 yillar davomida kafedraga t.f.n. J.T.Maxsudov, t.f.n., dotsent M.P.Parpievlar mudirlik qildilar.

Kafedrada u tashkil etilgan vaqtdan boshlab 4000 ga yaqin mutaxassislar tayyorlandi, 400 ga yaqin ilmiy maqolalar, 5 ta darslik yaratildi, 100 ga yaqin uslubiy va o‘quv qo‘llanmalari chop etildi, 20 ta ixtiroga mualliflik guvohnomasi olindi, 6 ta nomzodlik, 60 ga yaqin magistrlik dissertatsiyalari himoya qilindi.

"Telekommunikatsiya injiringi” kafedrasining yangi tarixi

TATU rektorining 2013 yil 29 avgustdagi 905-sonli buyrug‘iga asosan sobiq "Telekommunikatsiya tarmoqlari va kommutatsiya tizimlari” va "Telekommunikatsiya uzatish tizimlari” kafedralari bazasida "Telekommunikatsiya injiniringi” kafedrasi tashkil etildi. T.f.n. dotsent A.M.Eshmuradov esa kafedra mudiri lavozimiga tayinlandi. Hozirgi vaqtda yangi tashkil etilgan kafedrada jami 17 nafar professor-o‘qituvchilar faoliyat yuritmoqda. Shulardan: 1 nafar fan nomzodi, professor; 4 nafar fan nomzodlari, 5 nafar dotsentlar; 4 nafar katta o‘qituvchi hamda 7 nafar assistent o‘qituvchilardir.
Qariyb so‘nggi 10 yil davomida kafedraning professor-o‘qituvchilari ilmiy-tadqiqot, ma’naviy-ma’rifiy ishlar borasida salmoqli yutuqlarga erishdilar. S.A.Sadchikova (2012 y.) hamda UNICON.UZ DUK da faoliyat yuritayotgan J.D.Mukimov (2012 y.)lar t.f.n., prof.V.M.Son, t.f.n., prof. R.I.Isaevlar rahbarligida nomzodlik dissertatsiyalarini muvaffaqiyatli himoya qildilar.
Hozirda kafedrada 3-bosqich katta ilmiy xodim-izlanuvchisi G.B.Sherboboeva (t.f.d. professor A.R.Maraximov rahbarligida) «Методы моделирования процессов адаптивного управления мультисервисных сетей в условиях неопределенности и нечеткости информации» mavzuida, kafedra assistenti A.A. Muratova (t.f.d., professor T.N.Nishanbaev rahbarligida) «Модели и алгоритмы исследования надеждностных  показателей сети следующего поколения в условиях загруженности ее компонентов» mavzusida, assistent X.G.Soatov "Kanallari kod bilan ajratilgan optik tizimlar o‘tkazuvchanlik qobiliyatini oshirish algoritmi va modelini ishlab chiqish” (t.f.n. dotsent A.M. Eshmuradov maslahatchiligida) mavzularida doktorlik dissertatsiyasi ustida ilmiy izlanishlar olib bormoqdalar.
Kafedra o‘qituvchilari telekommunikatsiya, dasturlash texnologiyalari yo‘nalishlari bo‘yicha Hindiston (ass. X.G. Soatov), Koreya Respublikasi (ass. R.X.Nasimov, ass. J.A.Abdujalilov), Yaponiya, Xitoy (k.o‘q. M.B.Abdujapparova, dots. S.A.Sadchikova), Belgiya, Malayziya, Shveytsariya, Singapur, Gretsiya mamlakatlari yetakchi universitetlarida, o‘quv markazlarida malaka oshirib qaytdilar. Kafedra NYeS (Yaponiya), SHANHAY BELL, ZTE, Huawei (Xitoy), Daewoo (Koreya), Siemens (Germaniya) firmalarining Toshkentdagi vakolatxonalari mutaxassislari bilan ham doimiy aloqada bo‘lib kelmoqda.
So‘ngi ikki o‘quv yili davomida kafedra a’zolari tomonidan "TATU xabarlari”, ToshDTU xabarlari, The Advanced Science Journal (USA) jurnallarida 17 ta maqola, Halqaro, Respublika va universitet konferensiyalarida 40 dan ortiq ilmiy maqolalar e’lon qilindi.
Universitet rektori bo‘yrug‘iga asosan "Telekommunikatsiya injiniringi” kafedrasi o‘qituvchilari "Telekommunikatsiya texnologiyalari” fakultetining 12 ta akademik guruhlariga murabbiy etib tayinlanganlar. Kafedra o‘qituvchilari o‘zlariga biriktirilgan guruh talabalari bilan ma’naviy-ma’rifiy, madaniy-ahloqiy va tarbiyaviy ishlar olib borishadi.
Guruh murabbiylari murabbiylik soatlarida talabalarni O‘zbekiston Respublikasi Prezidenti va Hukumatining qaror va farmoyishlari, O‘zbekiston Respublikasining "Ta’lim to‘g‘risidagi” qonuni va "Kadrlar tayyorlash milliy dasturi”, odob-ahloq qoidalari, universitetning ichki tartib qoidalari va soha korxonalari faoliyati bilan tanishtirib boradilar. Guruh talabalari madaniy-ahloqiy ishlar bo‘yicha universitetda o‘tkazilayotgan turli tadbirlarda va bayramlarda ishtirok etib kelmoqdalar. Murabbiylar shuningdek reja asosida talabalarning Aloqa muzeyi, Xotira xiyoboni, Amir Temur muzeyi, Yoshlar ijodiy uyi, Alisher Navoiy nomli milliy kutubxona va soha korxonalaridan "O‘zbektelekom” AK "Telekommunikatsiyalar va personalni rivojlantirish markazi” filiali, "O‘zMobayl” korxonalariga ekskursiyasini uyushtirib boradilar. Ma’naviyat va ma’rifat soatlarida "Muomala madaniyati”,”Xalq an’analari va urf-odatlari yoshlar tarbiyasining asosi”,”Buyuk allomalarimizning ibratli hayoti”, "Ogohlik davr talabi”, "Terrorizmga qarshi kurash”, "Diniy ekstremizm va terrorizmga qarshi kurash” mavzularida suhbatlar olib borishadi.
Kafedrada shuningdek ustoz-shogird tizimi bo‘yicha kafedraning yetakchi o‘qituvchilari R.I.Isaev, A.M.Eshmuradov, N.Yu.Yunusovlar magistratura bosqichidagi talabalar bilan muntazam ravishda shug‘ullanib kelmoqdalar.

Bakalavriat

5350100

"Telekommunikatsiya texnologiyalari” (Telekommunikatsiyalar, Teleradioeittirish, Mobil tizimlar)

Magistratura

5A350101

"Telekommunikatsiya injiniringi”(Telekommunikatsiya tarmoqlari)

Kafedrada o’qitiladigan fanlar

Bakalavriat:

  • Internet tarmoqlari va xizmatlari
  • Multimediali aloqa tarmoqlari
  • Keng polosali tarmoqlar
  • Telekommunikatsiya tarmoqlari
  • Keyingi avlod konvergent tarmoqlari
  • Optik aloqa tizimlari
  • Telekommunikatsiya uzatish tizimlari (maxsus fakultet kursantlari uchun)
  • Kommutatsiya tizimlari (maxsus fakultet kursantlari uchun)

Magistratura:

  • Patentshunoslik, litsenziyalash va sertifikatlash
  • Nazorat o'lchov qurilmalari
  • IMS asosidagi multiservisli tarmoqlar
  • Telekommunikatsiya tarmoqlarining ishonchliligi

Kafedra professor o’qituvchilari

  • Eshmuradov Abdimurod Mengtashevich – kafedra mudiri, t.f.n., dotsent
  • Isaev Rixsi Isaxodjaevich – t.f.n., professor
  • Gulto‘raev Nurilla Xabibullaevich – t.f.n. dotsent
  • Yunusov Ne’matilla Yunusovich – f.-m.f.n., dotsent
  • Sadchikova Svetlana Aleksandrovna – t.f.n. dotsent
  • Radjapova Ra’no Nuritdinovna – dotsent v.b.
  • Abdujapparova Mubarak Baltabaevna – katta o‘qituvchi
  • Mirazimova Gulnora Xasanovna – katta o‘qituvchi
  • Normatova Dilbar Turgunovna – katta o‘qituvchi
  • Ibatova Dildora Xasanovna – katta o‘qituvchi
  • Soatov Xusan Gayratovich – assistent
  • Nasimov Rashid Xamid o‘g‘li – assistent
  • Muradova Alevtina Aleksandrovna – assistent
  • Xaytbaev Aybek Fayzullaevich – assistent
  • Muzaffarov Farrux Adxamovich – assistent
  • Davletova Xolisa - assistent

Kafedra faoliyat olib boruvchi o'rindosh professor-o’qituvchilar:

  • Muxitdinov Xakim Asrorovich– i.f.n.,dotsent
  • Ismanov Qobil Abduraxmonovich–assistent
  • Abdujalilov Javlon Adilovich–assistent

Bajarilayotgan davlat va chet el grantlari

  • «Исследование и разработка метода планирования уровня оптического доступа телекоммуникационной сети Узбекистана» (т.ф.н., доцент А.М.Эшмурадов)
  • «Исследование надежности волоконно-оптических кабелей связи» (т.ф.н., профессор Р.И.Исаев)
  • «Разработка аппаратно-программного СКЗИ абонентского засекречивания» (т.ф.н., профессор Р.И.Исаев)
  • «Исследование и разработка информационно-измерительной системы мониторинга функционирования автономных солнечных электростанций объектов связи» (т.ф.н., профессор Р.И.Исаев)

Kafedraning ilmiy-uslubiy ishlari

  • Sadchikova S.A., Xaytbaev A.F. - "Keng polosali tarmoqlar” fanidan laboratoriya fani uchun uslubiy qo‘llanma.
  • Eshmuradov A.M., Sadchikova S.A. - Abdujapparova M.B. Методическое пособие для проведения лабораторных занятий по дисциплине "Конвергентные сети следующего поколения”.
  • Gulturaev N.X., Ismanov Q.A. - "Telekommunikatsiya tarmoqlari” fanidan laboratoriya mashg‘ulotlari uchun uslubiy qo‘llanma.
  • Isaev R.I. - Методическое пособие "Мультимедийные сети связи".
  • Ibatova D.X. - "Multimediyali aloqa tarmoqlari” fanidan amaliy mashg‘ulotlar uchun uslubiy qo‘llanma.
  • Yunusov N.Yu. - Mirazimova G.X. "Optik aloqa tizimlari” fanidan laboratoriya mashg‘ulotlarni o‘tkazish uchun uslubiy qo‘llanma

Kafedraning rivojlanishidagi halqaro hamkorliklar

  • Janubiy Koreya universitetlari (KAIST, INHA);
  • Germaniya (Drezden texnika universiteti);
  • AQSh (Vebster universiteti);
  • Hindiston (Ilg‘or axborot texnologiyalarini rivojlantirish markazi, CDAC);
  • Rossiyaning yetakchi universitetlari.

Kafedraning soha korxonalari bilan istiqbolli hamkorlik aloqalari

  • "O‘zbektelekom” AK;
  • "O‘zbektelekom” AK "Telekommunikatsiya va personalni rivojlantirish markazi” filiali;
  • "O‘zbektelekom” AK "TShTT” filiali;
  • "O‘zbektelekom” AK "ToshTelekom” filiali;
  • "Huawei” korporatsiyasi mintaqaviy filiali;
  • "ZTE” korporatsiyasi mintaqaviy filiali.