15 iyul kuni Toshkent shahrida Axborot texnologiyalari va kommunikatsiyalarini rivojlantirish vazirligi hamda Koreya IT-sanoatini rivojlantirish milliy agentligi (NIPA) hamkorligida "Erkin va ochiq dasturiy ta’minot masalalari bo‘yicha O‘zbekiston-Koreya forumi” tashkil etildi.
Ushbu tadbirni tashkil etishda Koreya Savdo va Investitsiyalarni qo‘llab-quvvatlash agentligi (KOTRA), "Elektron hukumat” tizimini rivojlantirish markazi, Toshkent axborot texnologiyalari universiteti va Toshkent shahridagi Inha universiteti ham o‘z hissalarini qo‘shdilar.
Forum O‘zbekiston Respublikasining 2016 yil uchun iqtisodiy dasturining ustuvor vazifalarini bajarish doirasida, Koreya Respublikasining "elektron hukumat” tizimida erkin va ochiq dasturiy ta’minot (EODT) mahsulotlaridan foydalanish bo‘yicha tajribasini o‘rganish hamda mahalliy dasturiy ta’minot bozorini rivojlantirishga ko‘mak berish maqsadida o‘tkazildi.
Forumda NIPA, Koreya axborot jamiyat milliy agentligi, Koreya ilm-fan sohasi vakillari va tadbirkorlar ishtirok etdilar. Shu bilan birga, tadbirda NIPA Prezidenti Yun Djong Lok ham qatnashdi. O‘zbekiston tomonidan forum ishida vazirlik va idoralar, akademik va biznes doiralar, dasturiy ta’minot ishlab chiqaruvchilar ishtirok etdilar.
Tadbir davomida forum ishtirokchilari EODTni jamiyat rivojida qo‘llash va bu bo‘yicha xalqaro tajriba, tendensiyani muhokama qildilar. Shuningdek, ishtirokchilar EODT mahsulotlarini elektron hukumat va ta’lim tizimida joriy etish borasidagi Koreya tajribasi yuzasidan taqdimotlarni tingladilar. Shuningdek, ishtirokchilar avtomatlashgan, "aqlli” tizimlarda EODTning tatbiq etilishi, bu borada koreyalik kompaniyalar tajribasi to‘g‘risida ma’lumotga ega bo‘ldilar.
Ushbu forum doirasida xorijlik ishtirokchilar TATUga ham tashrif buyurishdi. Tashrif davomida Koreya Respublikasi vakillari hamda TATU rektori U.Hamdamov va Toshkentdagi Inha universiteti rektori Sh.Shermatov lar to’rt tomonlama memorandum imzolash yuzasidan kelishib olishdi.
