Energiya ta’minlash tizimlari

Kafedra 1958 yilda “Radioaloqa va radioeshittirish” fakulteti tarkibida “Аloqa qurilmalarining elektr taʼminoti” kafedrasi nomi bilan faoliyat yurita boshlagan.

“Аloqa qurilmalarining elektr taʼminoti” kafedrasida oʼqitiladigan fanlar boʼyicha mashgʼulotlar dastlab “Telefon aloqasi” kafedrasi tarkibidagi professor-oʼqituvchilar tomonidan olib borilgan.

Kafedra tashkil etilganda kafedra mudirligiga texnika fanlari nomzodi V.E.Korotkevich tayinlangan. Soʼngra kafedraga А.P.Golovin (1966-1975 yillar), texnika fanlari nomzodi, dotsent Yu.I.Kopnin (1975-1986 yillar), texnika fanlari nomzodi, dotsent I.А.Kildeev (1986-2002 yillar), texnika fanlari nomzodi, dotsent B.M.Maxkamdjanov (2002-2008 yillar) texnika fanlari nomzodi, dotsent M.S.Sapaev (2008-2011 yillar), F.M.Qodirov (2012-2014 yillar), texnika fanlari doktori, professor I.X.Siddikovlar (2014-2021) kafedra mudiri, PhD, dotsent O.U.Mallayev (2021-2023) kafedra mudiri bo‘lishgan. 2023 yil 15-fevraldan texnika fanlari nomzodi D.E.Eshmuradov rahbarlik qilib kelmoqda.

 

“Energiya ta’minlash tizimlari” kafedrasi respublikada birinchi boʼlib “Telekommunikatsiya tarmoqlari va tizimlari elektr energetikasi” sohasi boʼyicha bakalavrlar va magistrlar tayyorlash bo‘yicha faoliyat olib bormoqda.

Kafedra a’zolari

Kafedra hamda Oʻzbekiston Respublikasi Favqulodda vaziyatlar vazirligi Fuqaro muhofazasi instituti oʻrtasida doimiy hamkorlik yoʻlga qoʻyilgan.

Mazkur hamkorlik doirasida bir qator tadbirlar oʻtkazib kelinmoqda. Bu kabi amaliy mashgʻulot talabalarning “Hayot faoliyati xavfsizligi” hamda “Ekologiya” fanlaridan bilim va koʻnikmalarini yanada boyitishga xizmat qiladi.

Universitetda 60710600-“Elektr energetikasi” ta’lim yo‘nalishi va 70710601-“Elektr ta’minoti” magistratura mutaxassisligi tashkil etildi hamda o‘quv rejalari va dasturlarini ishlab chiqilgan. Kafedra professor o‘qituvchilari tomonidan o‘ndan ortiq grifli darslik va o‘quv qo‘llanmalari, xorijiy monografiyalar chop etilgan.

So‘nggi yillar davomida kafedra professor o‘qituvchilari orasidan 2 nafar fan doktori, 5 nafar PhD doktorlik dissertatsiyalari himoya qilganlar. Kafedra professor o‘qituvchilari xalqaro ilmiy loyihalarda, jumladan, Respublika va xalqaro miqyosidagi ilmiy loyihalar hamda ilmiy konferensiyalar ishtirok etib kelishmoqda. Ispaniya, Italiya, Niderlandiya, Shvetsiya, Polsha, Avstriya, Rossiya va boshqa rivojlangan davlatlar bilan hamkorlikda olib borilgan ilmiy loyihalarda qatnashishgan.

Hozirgi kunda Universitetda olib borilayotgan Yevropa Ittifoqining xalqaro ERASMUS+ loyihasi 101083224-ERASMUS-EDU-2022-CBHE-STRAND-2 “InnovativeMaster’s program in photonics and optical Communications to meet the needs of thetelecommunications labour market in Uzbekistan INMACOM – INMACOM” (2022-2026 yillarga mo‘ljallangan) ishtirok etishmoqda.

Kafedra professor-o‘qituvchilari tomonidan quyidagi korxonalarda sayyor dars mashg‘ulotlari tashkil etildi:

“Issiqlik elеktr stansiyalari” aksiyadorlik jamiyati;

Jumladan, Toshkent viloyati, Sirdaryo viloyati, Andijon viloyati va Toshkent shahrida energiya samaradorlikni oshirish boʻyicha belgilangan chora-tadbirlarning ijrosi bilan tanishdilar.

Xususan, joylardagi yirik iste’molchilar tomonidan mahsulotlarni ishlab chiqarishda energotejovchi qurilmalardan foydalanishlari borasida tushuntirishlar berildi. Ta’minot korxonalari va mutasaddi idoralar rahbarlariga kuz-qish mavsumiga tayyorgarlik, energiya balansini ishlab chiqish, uning koʻrsatkichlarini ta’minlash, energoresurslardan oqilona foydalanishni tizimli yoʻlga qoʻyish yuzasidan oʻz tavsiyalarini berildi.

Toshkent viloyatida energiya resurslaridan oqilona foydalanish va tejash, qoʻshimcha quvvatlarni aniqlash, ilmiy yondoshuvlar asosida samaradorlikka erishishda qoʻshgan hissasi uchun kafedra assistenti Nizomov Norxoʻja Bahodirovich Toshkent viloyati hokimining tashakkurnomasi hamda qimmatbaho sovgʻa (32 talik smart televizor) bilan taqdirlangan.

Kafedrada professor-o‘qituvchilarning xorijiy mamlakatlarda malaka oshirishga alohida e’tibor berilmoqda. Bu borada Xitoy Xalq Respublikasining taʼlim sohasidagi yetakchi Beijing Ruipan International Education Technology kompaniyasi bilan hamkorlik shartnomasi imzolangan.

 

Kafedrada iqtidorli talabalar bilan ishlash yaxshi yo‘lga qo‘yilgan. Universitet talabalidan iborat “REVIVAL GROUP” guruhi shakllantirildi va ushbu jamoa o‘z loyihasi bilan “TUIT BRIGHT FUTURE WEEK” tanlovida muvaffaqiyatli ishtrirok etib, Raqamli texnologiyalari vazirligi tomonidan Faxriy Yorliq hamda 30 (o‘ttiz) million so‘mlik voucher sertifikatini qo‘lga kiritdilar.

Kafedrada faoliyat olib borayotgan professor-o‘qituvchilar o‘zlarining ilmiy - pedagogik faoliyatlarida qator yutuqlarga erishishgan.

Ismailov Otabek Mirxalilovich, texnika fanlari doktori, professor. 1973 yilda Toshkent shahrida tug‘ilgan, millati - o‘zbek. 1994 yilda Тоshkent davlat texnika universitetini “Axborotlarni qayta ishlash va boshqarishni avtomatlashtirilgan tizimlari” mutaxassisligi  bo‘yicha, 2010 yilda esa O‘zbekiston Respublikasi Strategik tahlil va istiqbolni belgilash oliy maktabini “Siyosatshunos: tizimli tahlil va istiqbolni belgilash” mutaxassisligi bo‘yicha tamomlagan. “O‘zbekiston Respublikasi Mustaqilligiga 20 yil Esdalik nishoni” (2011 yil) bilan taqdirlangan. Uzoq yillar mobaynida O‘zbekiston Respublikasi Tashqi ishlar vazirligi tizimida, jumladan, Misr Arab Respublikasi hamda Yaponiyadagi elchixonalarida konsul, Axborot kommunikatsion texnologiyalari boshqarmasi boshlig‘i lavozimlarida mehnat qilgan.

Ilmiy-pedagoglik faoliyatida ko‘plab shogirdlarga ustozlik qilib kelmoqda.
2 ta darslik, shu jumladan, 1 ta darslik yakka mulliflikda, 6 ta o‘quv qo‘llanma va boshqa 100 dan ortiq ilmiy ishlanmalar muallifi.

Siddikov Ilxomjon Xakimovich millati - o‘zbek, 1959 yil Andijon viloyati Xo‘jaobod tumanida tavallud topgan. Oilali, 4 nafar farzandi bor. Umumiy mehnat staji 47 yil. Texnika fanlari nomzodi (1990), dotsent (1993), texnika fanlari doktori (2015), professor (2016).

Professor I.X.Siddikov sanoat korxonalari, shaxarlar, qishloq xo‘jaligi ob’ektlari va qurilmalarining elektr energiyasi bilan ta’minlash, energiya samaradorligini oshirish, elektr ta’minoti, qayta tiklanuvchan energiya manbalarini nazariy va amaliy tadqiq etish, hisoblash texnikasi va boshqaruv tizimlari elementlari va qurilmalari sohalarida zamonaviy ilmiy, axborot, uslubiy texnologiyalarni rivojlantirish, ilmiy tadqiqotlar  va o‘quv darslarini xorijiy tajriba va uslubiyatlari bilan taqqoslash va yuqori saviyada rivojlantirish asosida ilmiy darajali va malakali mutaxassis kadrlarni tayyorlash hamda malakasini oshirishda o‘z hissasini qo‘shib kelmoqda.

Professor I.X.Siddikov Muhammad al-Xorazmiy nomidagi Toshkent axborot texnologiyalari universiteti huzuridagi Fan doktori ilmiy darajasini beruvchi DCs.13/30.12.2017.T.07.02 raqamli ilmiy Kengashning 2017-2021 yillarda  Kengash raisi va 2022 yildan shu kungacha ushbu ilmiy Kengash a’zosi, 2017 yildan to shu kungacha Islom Karimov nomidagi Toshkent davlat texnika universiteti huzuridagi Fan doktori ilmiy darajasini beruvchi DSc.03/30.12.2019.T.03.02 raqamli ilmiy Kengash a’zosi, 2015 yildan hozirgacha O‘zbekiston Respublikasi alternativ energiya va yoqilg‘i manbalari korxonalari assotsiatsiyasi Kengashi a’zosi.

Professor I.X.Siddikov xalqaro va respublika miqyosida o‘tkazilgan ilmiy-texnik anjumanlarda 300 dan ortiq ilmiy maqola va ilmiy-uslubiy ishlar, shu jumladan: oliy ta’lim muassasalariga mo‘ljallangan va Oliy va o‘rta maxsus ta’lim vazirligining ruhsati (grifi) bilan 5 ta darslik, 7 ta o‘quv qo‘llanma, 6 ta monografiya, 100 dan ortiq ilmiy maqolalar va 150 dan ortiq ma’ruza tezislari, 20 dan ortiq o‘quv uslubiy ishlar, O‘zbekiston Respublikasi Intellektual mulk agentligi tomonidan tan olingan 6 ta ixtiroga mualliflik guvohnomasi, 8 ta ixtiro foydali modeliga patent hamda 20 dan ortiq dasturiy ta’minot guvohnomasi, shuningdek kasb-hunar kollejlari o‘quvchilarini o‘qitishga mo‘ljallangan 3 ta o‘quv qo‘llanmalar muallifi hisoblanadi.

2015 yili professor I.X.Siddikov tomonidan yaratilgan “Tokni kuchlanishga o‘zgartkich” IAP 04907 patentiga ixtiro eng yaxshi intellektual mulk ob’ekti sifatida respublika tanlovining “Eng yaxshi ixtiro” nominatsiyasi bo‘yicha birinchi darajali diplom bilan taqdirlangan.

Professor I.X.Siddikovning rahbarligida Muhammad al-Xorazmiy nomidagi Toshkent axborot texnologiyalari universitetida 2021/2022 o‘quv yilida tashkil etilgan 70710601 - Elektr ta’minoti (telekommunikatsiya tarmoqlari va tizimlari) magistratura mutaxassisligi va 2022/2023 o‘quv yilida tashkil etilgan 70710600 - Elektrenergetika (telekommunikatsiya tarmoqlari va tizimlari) bakalavriatura yo‘nalishi bo‘yicha talabalar qabullarini amalga oshirilishi asosida hozirda ushbu mutaxassislik va yo‘nalishlarda o‘quv jarayoni muvaffaqiyatli amalga oshirilmoqda.

Sapayev Mamatkarim 1950 yilda tavallud topgan. Sapayev M. 1972 yilda Toshkent politexnika institutining “Avtomatika va telemexanika” mutaxassisligini tamomlab, mehnat faoliyatini shu yildan boshlagan. U 1972-2005 yillar davomida Toshkent davlat texnika universitetida assistent, katta o‘qituvchi, dotsent, ichki inspeksiya bo‘limi boshlig‘i va kadrlar bo‘limi boshlig‘i lavozimlarida ishlagan. 2005 yildan 2015 yilgacha Toshkent axborot texnologiyalari universitetida “Ichki nazorat va monitoring” bo‘limi boshlig‘i vazifasida ishlagan. Shu muddat davomida o‘rindoshlik asosida “Aloqa qurilmalari elektr ta’minoti” kafedrasi mudiri lavozimida faoliyat olib borgan. U 2015 yildan Elektr ta’minlash tizimlari kafedrasi dotsenti lavozimida faoliyat olib bordi. 1988 yilda texnika fanlari nomzodi ilmiy darajasiga va 1993 yilda dotsent ilmiy unvoniga ega bo‘lgan.

Sapayev M. Respublika oliy ta’lim tizimini rivojlantirishda faol ishtirok etadi. O‘quv jarayoniga oid me’yoriy hujjatlarni hamda davlat ta’lim standartlarini ishlab chiqishda, yangi ta’lim yo‘nalishlari va magistratura mutaxassisliklarini tashkil etishda faol ishtirok etib kelmoqda. So‘nggi yillarda universitetda 60710600-Elektr energetikasi ta’lim yo‘nalishi va 70710601-Elektr ta’minoti magistratura mutaxassisligi tashkil etilishida hamda o‘quv dasturlarini ishlab chiqishda mas’ul ijrochi bo‘lgan.

Sapayev M. 2ta darslik, 4ta o‘quv qo‘llanma, 60 dan ortiq o‘quv – metodik ishlanmalar muallifi. Jumladan, 2021-2024 yillarda grif berilgan “Avtomatik boshqarish nazariyasi”, “Infokommunikatsiya tizimlari elektr ta’minoti”, “Hayot foaliyati xavfsizligi”, “Energetikada yashil texnologiyalar”, nomli darslik va o‘quv qo‘llanmalari tayyorlangan. O‘quv jarayonida zamonaviy axborot texnologiyalarini qo‘llagan holda ma’ruza mashg‘ulotlarini olib boradi, bitiruv malakaviy ishlariga va magistrlik dissertatsiyalariga rahbarlik qilib kelmoqda.

Respublika va xalqaro miqyosidagi ilmiy loyihalar hamda ilmiy konferensiyalar ishtirokchisi. Ispaniya, Italiya, Niderlandiya, Shvetsiya, Polsha, Avstriya, Rossiya va boshqa rivojlangan davlatlar bilan hamkorlikda olib borilgan ilmiy loyihalarda qatnashgan. Hozirgi kunda Universitetda olib borilayotgan Yevropa Ittifoqining xalqaro ERASMUS+ loyihasi 101083224-ERASMUS-EDU-2022-CBHE-STRAND-2 “InnovativeMaster’s program in photonics and optical Communications to meet the needs of thetelecommunications labour market in Uzbekistan INMACOM – INMACOM” (2022-2026 yillarga mo‘ljallangan) ishtirokchisi. Toshkent axborot texnologiyalari universiteti huzuridagi fan doktori ilmiy darajasini beruvchi DSC.28.12.2017.T.07.02 raqamli ilmiy Kengashi qoshidagi ilmiy seminar a’zosi bo‘lgan. Hozirgi kunda Toshkent davlat texnika universiteti huzuridagi fan doktori ilmiy darajasini beruvchi DSC.027/06.2017.T.03.02 raqamli ilmiy Kengash qoshidagi ilmiy seminar a’zosi.

Sapayevning ilmiy izlanishlari turli sohalardagi murakkab tizimlar va ob’ektlarni boshqarish hamda modellashtirish masalalariga yonaltirilgan. Hozirgi kunda esa telekommunikatsiya va energetika tizimlarini intellektual usullar yordamida loyihalash muammolariga oid ilmiy izlanishlar olib bormoqda. Texnika sohasi bo‘yicha ilmiy kadrlarni tayyorlashda bevosita ishtirok qilmoqda.

Sapayev M. o‘z faoliyatidagi muvaffaqiyatlari uchun O‘zbekiston Respublikasi axborot texnologiyalari va kommunikasiyalarini rivojlantirish vazirligi, O‘zbekiston Respublikasi oliy va o‘rta maxsus ta’lim vazirligi hamda bir necha marotaba Toshkent axborot texnologiyalari universiteti rahbariyati tomonidan faxriy yorliqlar va qimmatbaho sovg‘alar bilan taqdirlangan. O‘zbekiston Respublikasi Mustaqilliging 30 yilligi ko‘krak nishoni sohibi.

Eshmuradov Dilshod Elmuradovich universitetning “Energiya ta’minlash tizimlari” kafedrasida mudir lavozimida ishlab kelmoqda. Texnika fanlari nomzodi, dotsent. Turon Fanlar Akademiyasining akademigi.

2009 yilda professor A.Abdukayumov rahbarligida nomzodlik dissertatsiyasini muvaffaqiyatli himoya qilgan. 100 dan ortiq ilmiy ishlanmalar, jumladan xalqaro nufuzli bazalarga kiruvchi xorijiy ilmiy jurnallarda maqolalar chop ettirgan. Shuningdek, 1 ta darslik, 2 ta monografiya, 8 ta o‘quv qo‘llanma va ko‘plab DGUlar muallifi.

D.Eshmuradovning tashabbusi bilan kafedra tarixida birinchi marta xalqaro konfertsiya tashkil etildi va 2024-yil 1-mart kuni “Science and innovation” xalqaro ilmiy jurnali bilan hamkorlikda “Hilton Tashkent City” mehmonxonasida nufuzli xalqaro anjuman o‘tkazildi.

 

“Raqamli texnologiyalar obyektlari energiya ta’minotini rivojlantirishning zamonaviy muammolari va istiqbollari” mavzusidagi ushbu konferensiya texnika sohasining eng taniqli olimlarini bir joyga jamladi. 

Muhtaram prezidentimiz Shavkat Mirziyoyev shunday deydilar: Tarmoq va hudud rahbarlari raqamlashtirishsiz natija, rivojlanish bo‘lmasligini tushunib yetishi shart. Barcha darajadagi rahbarlar buni o‘ziga kundalik vazifa sifatida belgilab, raqamlashtirish sohasini alifbosidan boshlab chuqur o‘rganishi kerak.

Shundan kelib chiqqan holda, oʼtkazilayotgan ushbu anjumanda raqamli texnologiyalar obyektlari sifatini oshirishdagi tajribalar, xususan energiya ta’minotini rivojlantirishning muammolari va erishilayotgan yutuqlar muhokama qilindi.

 

Konferensiyaga AQSh, Rossiya, Belorus, Armaniston, Norvegiya, Malaysiya, Qozog‘iston, Shri-Lanka, Qirg‘iziston va boshqa mamlakatlar olimlari, yurtimizning turli nuqtalaridan 100 dan oshiq sohaning professor-o‘qituvchilari, yosh taqdiqotchilar tashrif buyurdilar. Ma’ruzalar jarayonida raqamli texnologiyalar, energiya ta’minoti masalalari haqida mulohazalar yuritildi.

Konferensiyaga xorijiy davlatlardan 40 ga yaqin, yurtimiz olimlari tomonidan 300 dan ortiq maqolalar kelib tushdi va ularning 130 tasi qabul qilindi. Konferensiyaga qabul qilingan har bir maqola uchun DOI raqam olindi hamda, bir nechta xalqaro bazalarda indekslandi. Xususan, Polshaning Index Copernicus, Yevropaning Zenodo hamda Open Aire, Rossiyaning Cyberleninka, Angliyaning Europub bazalariga joylashtirildi va Google akademiya ilmiy qidiruv tizimida indekslandi. Maqolalar “Science and innovation” xalqaro ilmiy jurnalining maxsus soni sifatida nashr qilindi. Konferensiya materiallarining xalqaro bazalarda indekslanganligi ulardan dunyoning ko‘plab davlatlaridagi ilmiy tadqiqotchilar foydalanishiga imkon yaratadi.

D.Eshmuradov uzoq yillar mobaynida O‘zbekiston Respublikasi Tashqi ishlar vazirligida turli lavozimlarda ishlagan. Ikkinchi darajali ikkinchi kotib diplomatik unvonga ega. Turon Fanlar Akademiyasining akademigi, 05.01.05 – “Axborotlarni himoyalash usullari va tizimlari. Axborot xavfsizligi” ilmiy seminar a’zosi. Xalqaro ilmiy jurnal («Crede Experto: transport» http://ce.if-mstuca.ru/), “Science and Innovation” hamda YevroOsiyo Innovatsion Universiteti xabarnomasi tahririyat a’zosi.

Ilm-fan sohasidagi yutuqlari uchun “Oʻzbekistonning taniqli olimlari” milliy ensiklopediyasiga kiritilgan.

Yoshlar tarbiyasi, ularning boʻsh vaqtlarini mazmunli tashkil etish, turli ijtimoiy tashabbuslarni qoʻllab-quvvatlash borasida qo‘shgan hissasi uchun O‘zbekiston Respublikasi maktabgacha va maktab ta’limi vazirligining Faxriy Yorlig‘ibilan taqdirlangan.

Abdullayeva Surayyo Munirovna 1969 yil Toshkent shahrida ziyolilar oilasida tavallud topgan.

U 1987 yilda Toshkent elektrotexnika aloqa institutiga (hozirgi Muxammad al-Xorazmiy Toshkent axborot texnologiyalari universiteti) kirib, uni 1992 yilda “Koʻp kanalli elektraloqa” yoʻnalishi boʻyicha tugatgan.

S.M. Abdullaeva 1992 yilda “Aloqa qurilmalarining elektr ta’minoti” kafedrasida katta laborant lavozimida ish boshlab, hozirgi kunda “Energiya ta’minlash tizimlari” kafedrasining katta oʻqituvchi lavozimida faoliyat yuritib kelmoqda.

S.M. Abdullaeva ilmiy-pedagogik faoliyati davrida 140 dan ortiq ilmiy ishlari chop etilgan boʻlib, 3 ta monografiya, oliy oʻquv yurtlari uchun 1 ta darslik, 30 ta oʻquv –uslubiy qoʻllanmalar, 15 ta uslubiy ishlar, kafedra fanlari boʻyicha oʻquv-uslubiy majmualar yaratgan.

 

 

Oʻzbekiston Respublikasining Intellektual mulk agentligi tomonidan berilgan 5 ta EHM dasturlari uchun guvohnomalar muallifidir.

Shu bilan bir qatorda nufuzli xalqaro jurnallarda (Skopus) ilmiy maqolalari chop etilgan. Xalqaro va respublika miqyosda oʻtkazilayotgan ilmiy anjumanlarda faol ishtirok etib kelmoqda. Universitetning ijtimoiy, ma’naviy – ahloqiy va tarbiyaviy tadbirlarda ham faol qatnashmoqda. Jumladan, yosh avlodni kasbga yoʻnaltirishda maktab, kollej-liseylarga tashrif buyuradi.

“Energiya ta’minlash tizimlari” kafedrasida mehnat faoliyatini davom ettirarkan, talaba-yoshlarning mehribon ustozi va oʻz kasbining ustasi kabi sifatlarini namoyon etib kelmoqda. 2008 yildan 2021 yilgacha TATU akademik guruhlarida murabbiylik faoliyatini olib borgan.

Kafedrada oʻquv jarayonini tashkil etish va takomillashtirish boʻyicha ishlarini olib boradi, fanlardan yangi oʻquv dasturlarini ishlab chiqishda ishtirok etadi, talabalar bilan oʻquv samaradorligi va intizomi masalalari boʻyicha ishlar olib boradi.

Amurova Natalya Yur’evna - pedagogika fanlari bo‘yicha falsafa doktori. 1999 yilda Toshkent elektrotexnika aloqa instituti (hozirgi TATU)ni “Avtomatik elektr aloqa muhandisi” mutaxassisligi bo‘yicha o‘qishni tamomlagan.

Mehnat faoliyatini 1994-yildan “Iqtisodiy nazariya” kafedrasida laboranti sifatida boshlagan. 2003-yildan esa dastlab “Aloqa qurilmalari energiya ta’minoti” kafedrasi laboratoriyasi mudiri, keyinchalik esa assistent va “Energiya ta’minoti tizimlari” kafedrasi katta o‘qituvchisi lavozimlarida ishlab kelmoqda.

O‘zining ilmiy ishida infokommunikatsiya tizimlari energiya ta’minoti sohasida talabalar uchun asosiy kompetensiyalarni rivojlantirishga qaratilgan loyihaviy ta’lim metodikasini ishlab chiqdi va bu ta’lim texnologiyalari rivojlanishiga muhim hissa bo‘lib qo‘shildi.

Uning ilmiy izlanishlari talabalar orasida elektrtexnika va infokommunikatsiya tizimlari sohasida murakkab masalalarni hal etish uchun zarur bo‘lgan kasbiy ko‘nikmalarni samarali shakllantirish usullarini o‘rganishga qaratilgan. Ishlab chiqilgan loyihaviy ta’lim metodikasi talabalar strategik fikrlashini kuchaytiradi, ularning ijodiy va tanqidiy fikrlash qobiliyatini rivojlantiradi, shuningdek, ijtimoiy va professional moslashuv jarayonini qo‘llab-quvvatlaydi. N.Yu. Amurova nufuzli ilmiy jurnallarda maqolalar chop etgan hamda xalqaro konferensiyalarda qatnashgan.

Borisova Elena Anatolyevna, pedagogika fanlari bo‘yicha falsafa doktori (PhD). 1976 yilda Toshkent shahrida tug‘ilgan. 2000-yilda Toshkent elektrotexnika aloqa institutini “Avtomatik elektr aloqasi muhandisi” mutaxassisligi bo‘yicha tamomlagan. Mehnat faoliyatini aloqa qurilmalari elektr ta’minoti kafedrasi laboranti lavozimida boshlagan. 2011 yildan boshlab kafedrada katta o‘qituvchi lavozimida ishlab kelmoqda. Pedagogika va energetika sohalarida ilmiy-tadqiqot ishlarini olib boradi. 50 dan ortiq ilmiy maqolalar muallifi, xalqaro va respublika konferensiyalari ishtirokchisi. 2025-yilda “Texnik oliy ta’lim muassasasi talabalarida maqbul tavakkalchilik ko‘nikmalarini rivojlantirish” mavzusida nomzodlik dissertatsiyasini himoya qilgan. O‘zbekiston Respublikasi Energetika vazirligining Faxriy yorlig‘i bilan taqdirlangan.

XALQARO HAMKORLIK ALOQALARI

• Qirollik texnologiya instituti (Shvetsiya)
• Madrid politexnika universiteti (Ispaniya)
• Xelsinki universiteti (Finlyandiya)
• Yuvaskulya universiteti (Finlyandiya)
• Yadroviy tadqiqotlar milliy universiteti – MIFI (Rossiya)
• Salzburg amaliy fanlar universiteti (Avstriya)
• Moskva davlat qurilish universiteti (Rossiya)
• Astraxan qurilish muhandislik universiteti (Rossiya)
• Qozon davlat arxitektura va qurilish universiteti (Rossiya)
• P. Ogarev nomidagi Mordoviya davlat universiteti (Rossiya)
• Qurilish muhandislik ta’lim tashkilotlari uyushmasi (Rossiya)
• Rossiya Texnik Jamiyati (Rossiya)
• Mo‘g‘uliston milliy universiteti (Mo‘g‘uliston)
• Mo‘g‘uliston fan va texnologiya universiteti (Mo‘g‘uliston)
• Osh texnologiyalari universiteti (Qirg‘iziston)
• Peterburg davlat telekommunikatsiyalar universiteti (Rossiya)
• Universiti Malaysia Terengganu (UMT)