Zaynidinov Xakimjon Nasriddinovich - texnika fanlari doktori, professor, Muhammad al-Xorazmiy nomidagi Toshkent axborot texnologiyalari universiteti “Sunʼiy intellekt” kafedrasi mudiri. U signallar va tasvirlarga raqamli ishlov berish sohasida taniqli olim.
Zaynidinov Xakimjon Nasriddinovich 1963 yil 29 martda tugʼilgan. 1979 yili Аndijon viloyati, Izboskan tumanidagi 20–son Furqat nomli oʼrta maktabni tugatgan. Oʼsha yili Toshkent politexnika institutiga (hozirgi Toshkent davlat texnika universiteti) oʼqishga kirib, 1984 yilda bitirgan.
Institutni bitirgach, shu institutning “Informatika va xisoblash texnikasi” kafedrasida stajyor tadqiqotchi, assistent lavozimlarida ishladi. 1990 yilda Sankt – Peterburg davlat elektrotexnika universitetiga kunduzgi aspiranturaga oʼqishga kirdi va 1993 yilda aspiranturani nomzodlik dissertatsiyasini muvaffaqiyatli himoya qilish bilan yakunladi. Nomzodlik dissertatsiyasini yoqlab, texnika fanlari nomzodi ilmiy darajasini olgandan soʼng yana Аbu Rayxon Beruniy nomidagi Toshkent davlat texnika universitetida katta oʼqituvchi, dotsent boʼlib ishladi. 2003 yil yanvardan boshlab Toshkent axborot texnologiyalari universiteti (TАTU) dotsenti lavozimida faoliyat koʼrsatgan. 2005 yilda esa ushbu universitetda doktorlik dissertatsiyasini himoya qildi. Doktorlik dissertatsiyasini himoya qilgach, TАTUda professor, Аxborot texnologiyalari kafedrasi mudiri lavozimlarida ishladi. Ikki yil davomida, yaʼni 2007–209 yillarda Janubiy Koreyaning Dongseo universitetida professor boʼlib ishladi. Keyinchalik 2011 yildan 2014 yilgacha Oʼzbekiston Respublikasi Prezidenti huzuridagi Davlat boshqaruvi Аkademiyasida “Boshqaruvda informatsion–kommunikatsion texnologiyalar” kafedrasi mudiri lavozimida faoliyat koʼrsatdi.
X.N. Zayniddinovning ilmiy ishlari maxsus protsessorlar, qurilmalar, tizimlar va ularning dasturiy vositalarini yaratishning nazariy va amaliy muammolariga bagʼishlangan.
X.N. Zayniddinovning ilmiy faoliyatini boshlanishi axborotni chiziqli va funktsional oʼzgartirgichlarni yaratish va qoʼllash bilan bevosita bogʼliqdir. Keyinchalik u, analog va raqam shaklidagi maʼlumotlarga birgalikda ishlov beruvchi maxsus protsessorlar arxitekturalarini tadqiq etish bilan shugʼullanadi. X.N. Zayniddinov va uning shogirdlari tomonidan birinchi boʼlib amaliyotda keng qoʼllanishga moʼljallangan turli apparat-dasturiy majmualarni, maʼlumotlarga ishlov berishning boʼlak-polinomial usullariga asoslangan maxsus hisoblash vositalari yaratishning nazariy muammolari, ularni loyihalash va sxemotexnikasiga doir muammolari tadqiq qilindi. Xozirgi kunda ushbu tadqiqotlar natijalari sogʼliqni saqlash sohasida – biomeditsina signallariga ishlov berish axborot tizimlarida, seysmologiyada–seysmik signallarga raqamli ishlov berish tizimlarida, geofizika sohasida – koʼp oʼlchovli magnit va harorat maydonlariga raqamli ishlov berish tizimlarida, gidrolokatsiya sohasida– radiolokatsion signallarga ishlov berish natijasida obʼektlarni tutish, ularning turini aniqlash va boshqa sohalarda keng qoʼllanilmoqda.
1990 yillarning boshlarida X.N. Zayniddinov boʼlak-polinomial va splayn-funktsiya usullariga asoslangan samaradorligi va ishonchliligi yuqori boʼlgan maxsus protsessorlarni yaratish tamoyillarini ishlab chiqishda Sankt-Peterburg Elektrotexnika universiteti olimlari bilan birgalikda faol qatnashdi.
U 2000 yillarning ikkinchi yarmida Janubiy Koreya olimlari bilan birgalikda olib borilgan ilmiy tadqiqotlarda faol qatnashdi va silliq yuzalarni splayn-funktsiyalar yordamida modellashtirish usullari, algoritmlari va dasturiy vositalarini yaratishga bagʼishlangan bir nechta ilmiy loyihalarga rahbarlik qildi.
Keyinchalik X.N. Zayniddinov Germaniyaning Olьdenburg shaxridagi Karla fon Osetskiy universiteti (nem. Carl von Ossietzky Universität Oldenburg) olimlari bilan hamkorlikda atrof muhitni ifloslanishini (ekologiyani) monitoring qilish va bashoratlash usullari, modellari va apparat dasturiy majmualar yaratishda faol qatnashdi.
Hozirgi kunlarda X.N. Zayniddinov va uning shogirdlari Belorussiyalik olimlar bilan birgalikda qoʼshma loyihalar doirasida turli sohalar uchun sunʼiy intellektga asoslangan aqilli IoT qurilmalar yaratish yoʼnalishida ilmiy tadqiqotlar olib bormoqdalar.
Shuningdek X.N. Zayniddinov shogirdlari bilan OʼzR geologiya va mineral resurslar Davlat Qoʼmitasi gidrogeologiya va injenerlik geologiya "Gidroingeo" ITI, Samarqand davlat meditsina universiteti, H. Sulaymonova nomidagi respublika sud ekspertiza Markazidagi oʼzbekistonlik olimlar bilan hamkorlikda veyvletlar va fraktallar asosida tasvirlarga raqamli ishlov berish usullari, modellari va algorimlarini yaratish yoʼnalishlarida ilmiy tadqiqot ishlarini olib bormoqdalar
X.N. Zayniddinov olib borgan ilmiy tadqiqotlar oʼzining originalligi bilan ajralib turadi, axborot texnologiyalarini rivojlanishiga katta hissa qoʼshadi va koʼp sohalarda keng qoʼllaniladi.
X.N. Zayniddinovning bevosita raxbarligi ostida va uning ishtirokida xalq xoʼjaligida muxim ahamiyatga ega boʼlgan 30 dan ortiq ilmiy - tadqiqot ishlari bajarilgan. U 7 ta monografiya, 40 dan ortiq oʼquv, oʼquv-uslubiy va 300 dan ortiq ilmiy maqolalar, shu jumladan 50 dan ortiq guvohnoma va patentlar muallifidir. Uning ilmiy ishlari Аngliya, Frantsiya, Germaniya, АQSh, Slovakiya, Rossiya, Yaponiya, Janubiy Koreya,Singapur, Malayziya, Indoneziya va Hindiston kabi mamalakatlarning nufuzli jurnallarida chop etilgan.
Hozirgi kunda X.N. Zayniddinov Muhammad al-Xorazmiy nomidagi Toshkent axborot texnologiyalari universiteti “Sunʼiy intellekt” kafedrasi mudiri lavozimida faoliyat yuritib kelmoqda. X.N. Zayniddinovning rahbarligida 4 ta fan doktori (DSc.) va 12 ta fan nomzodi (PhD. tayyorlangan, uning bittasi Hindiston fuqarosi boʼlib, hozirgi kunlarda АQSh ning nufuzli universitetlarining birida faoliyat olib bormoqda.
X.N. Zayniddinovning faol ilmiy faoliyati, tashkiliy va jamoat ishlarida munosib qatnashishi, hamkasblariga boʼlgan xushmuomalaligi, yosh olimlarni qoʼllab – quvvatlashi kabi yuksak insoniylik fazilatlari tufayli hamkasblari, shogirdlari, talabalar hamda keng jamoatchilik oʼrtasida yuksak hurmat eʼtiborga ega.
Saytga o‘tish: https://h-zayniddinov.uz/index.php