Davlatimizning milliy xavfsizligini ta’minlash faqat davlat yoki huquqni
muhofaza qiluvchi organlarning vazifasi bo‘lib qolmay, balki har bir fuqaroning
majburiyati va burchi hamdir. Zotan, milliy xavfsizligimiz - biz yashayotgan
mamlakat, jamiyatimiz, oilamiz, ota-onamiz, farzandlarimiz, qolaversa, kelajak
avlodlarimiz xavfsizligidir.
Shu maqsadda O‘zbekiston Respublikasi Oliy va o‘rta maxsus ta’lim vazirligi
hamda manfaatdor idoralar bilan hamkorlikda 26.05.2016 yil Toshkent axborot
texnologiyalari universiteti talaba-yoshlari o‘rtasida turli yot g‘oyalar va
tahdidlarga qarshi kurashish, mafkuraviy immunitetni shakllantirish hamda
huquqiy madaniyatni yuksaltirish maqsadida "Odam savdosi - hudud, chegara,
millat tanlamaydigan mudhish jinoyatdir” mavzuida targ‘ibot tadbirlari tashkil
etildi.
Tadbirlarda Toshkent axborot texnologiyalari universiteti
professor-o‘qituvchilari, fakultet dekanlari va ma’naviy-ma’rifiy ishlari
bo‘yicha muovinlari, ijtimoiy-gumanitar fanlar kafedra mudirlari hamda 380
nafardan ortiq talaba-yoshlar ishtirok etishdi.
Kun tartibidagi mavzu yuzasidan O‘zbekiston Respublikasi Oliy va o‘rta maxsus
ta’lim vazirligidan biriktirilgan mas’ul xodim X.Eshov, Respublika Ma’naviyat
targ‘ibot markazi bo‘lim boshlig‘i Z.G‘affarova hamda Toshkent shahar IIBB
xorijga chiqish, kelish va fuqarolikni rasmiylashtirish boshqarmasi katta
inspektori M.Razaqovlar ma’ruza qildilar.
Davra suhbatidan ko‘zlangan asosiy maqsad xorijda ishlashning qonuniy asoslari
hamda odam savdosiga qarshi kurashning mazmun-mohiyatini yoshlarga yetkazish,
ayniqsa ularga odam savdosining ayanchli oqibatlari haqida tushunchalar berish,
ushbu illatning oldini olishda keng jamoatchilik hamda yoshlarning faol
ishtirokini ta’minlashdan iboratdir.
Bugungi kunda butun dunyoda noqonuniy migratsiya va odam savdosi global muammo
sifatida keng jamoatchilik diqqat markazida turibdi. Shu boisdan mamlakatimizda
noqonuniy migratsiya va odam savdosi muammosiga qarshi kurashish bo‘yicha
qonunchilik tizimi yaratilgan.
Tadbir ishtirokchilari tomonidan respublikamizda noqonuniy migratsiya va odam
savdosi muammosining salbiy oqibatlari va ushbu muammoga qarshi mamlakatimizda
olib borilayotgan amaliy ishlar aniq dalillar misolida tushuntirildi. Odam
savdosi muammosini oldini olish faqatgina davlat tashkilotlarining vazifasi
emasligi, har bir fuqaro bu borada olib borilayotgan chora-tadbirlarga
o‘zlarining faol munosabatlari bilan ko‘maklashishlari katta ahamiyat kasb
etishi ham ta’kidlandi.
Tadbir davomida "Aldanganlar” videofilmi namoyish etildi. Tadbir qizg‘in tarzda
o‘tib, talabalar o‘zlarini qiziqtirgan savollarga ma’ruzachilardan batafsil
javob olishdi.
