2025-YIL 30-AVGUST KUNI MUHAMMAD AL-XORAZMIY NOMIDAGI TOSHKENT AXBOROT TEXNOLOGIYALARI UNIVERSITETINING 1 (754)-SONLI ILMIY KENGASH MAJLISI BO‘LIB O‘TDI.
2025-yil 30-avgust kuni Muhammad al-Xorazmiy nomidagi Toshkent axborot texnologiyalari universitetining 1 (754)-sonli Ilmiy kengash majlisi bo‘lib o‘tdi. Mazkur yig‘ilishda universitet faoliyatining muhim yo‘nalishlari, xususan, 2025/2026-o‘quv yiliga tayyorgarlik, ta’lim jarayonini takomillashtirish, normativ-huquqiy hujjatlarni tasdiqlash hamda tashkiliy masalalar atroflicha muhokama qilindi.
Yig‘ilish avvalida O‘zbekiston Respublikasi Mustaqilligining 34 yilligiga bag‘ishlangan ma’naviy-ma’rifiy tadbirlarni yuqori saviyada tashkil etish masalasi ko‘rib chiqildi. Ushbu yo‘nalishda talabalar o‘rtasida vatanparvarlik ruhini mustahkamlash, milliy qadriyatlarni keng targ‘ib etish hamda ularning ijtimoiy faolligini oshirishga qaratilgan kompleks tadbirlar rejasini amalga oshirish zarurligi ta’kidlandi.
Shundan so‘ng universitetning 2025/2026-o‘quv yiliga tayyorgarlik holati tahlil qilindi. O‘quv jarayonlarini sifatli tashkil etish, moddiy-texnik bazani mustahkamlash, professor-o‘qituvchilar tarkibini samarali shakllantirish hamda zamonaviy pedagogik texnologiyalarni keng joriy etish bo‘yicha aniq vazifalar belgilab olindi.
Kengash yig‘ilishida O‘zbekiston Respublikasi Vazirlar Mahkamasining 149-son qarori asosida ta’lim grantlari ajratiladigan talabalar ro‘yxatini tasdiqlash masalasi ham ko‘rib chiqildi va tegishli tartibda tasdiqlandi.
Muhim masalalardan biri sifatida universitetda o‘tiladigan fanlar bo‘yicha o‘quv dasturlari hamda 2025/2026-o‘quv yiliga mo‘ljallangan o‘quv rejalari tasdiqlandi. Mazkur qarorga ko‘ra, yangi o‘quv yilida kunduzgi ta’lim shaklining 1-bosqichida 22 ta ta’lim yo‘nalishi, magistraturaning 1-bosqichida esa 31 ta mutaxassislik bo‘yicha ta’lim jarayoni tashkil etilishi rejalashtirilgan. Shuningdek, masofaviy ta’lim shaklida 11 ta yo‘nalishda o‘quv jarayonlari yo‘lga qo‘yilishi belgilandi.
Hisobotda qayd etilishicha, universitetda yangi tashkil etilgan “Biznesni boshqarish”, “Marketing” hamda “Elektronika va asbobsozlik” ta’lim yo‘nalishlari, shuningdek, “Kompyuter tizimlari va ularning dasturiy ta’minoti”, “Axborot tizimlari”, “Televideniye, radioaloqa va radioeshittirish tizimlarining xavfsizligi” mutaxassisliklari bo‘yicha o‘quv rejalari ishlab chiqilgan. Ushbu o‘quv rejalari O‘zbekiston Respublikasi Oliy ta’lim, fan va innovatsiyalar vazirligining tegishli buyruqlari asosida shakllantirilib, xalqaro TOP-300 oliy ta’lim muassasalari tajribasi hamda mahalliy mehnat bozori talablariga mos holda takomillashtirilgan. Shu bilan birga, ayrim mutaxassisliklar uchun yangi fan dasturlari va sillabuslar ishlab chiqilganligi qayd etildi.
Kengash yig‘ilishida yana bir muhim masala, universitetning O‘quv-uslubiy boshqarma Nizomini tasdiqlash masalasi muhokama qilindi. Mazkur Nizom O‘zbekiston Respublikasi Oliy ta’lim, fan va innovatsiyalar vazirligining 2025-yil 3-iyuldagi 252-son buyrug‘i asosida ishlab chiqilgan bo‘lib, unda boshqarma tuzilmasi, boshqaruv tizimi, asosiy vazifalari, funksiyalari, huquq va majburiyatlari, shuningdek, xodimlarning lavozim vazifalari batafsil yoritilgan. Ushbu Nizom universitet rahbariyati va tegishli tarkibiy bo‘linmalar tomonidan ko‘rib chiqilib, ma’qullangan hamda Kengash tomonidan tasdiqlandi.
Yig‘ilish davomida bir qator tashkiliy masalalar ham ko‘rib chiqildi. Jumladan, Kengashning 2025/2026-o‘quv yili uchun ish rejasini tasdiqlash, assistent-o‘qituvchilarga ma’ruza o‘qish huquqini berish, masofaviy ta’lim shakli bo‘yicha qo‘shimcha qabul kvotalarini tashkil etish, Raqamli texnologiyalar vazirligi tomonidan yaratilgan “AKT ko‘rsatkichlari” platformasiga zarur ma’lumotlarni taqdim etish, moliyaviy mablag‘lardan maqsadli foydalanish va moliyaviy intizomni mustahkamlash hamda Kengash tarkibiga o‘zgartirish va qo‘shimchalar kiritish masalalari muhokama qilinib, tegishli qarorlar qabul qilindi.
Yig‘ilish yakunida ko‘rib chiqilgan barcha masalalar yuzasidan tegishli qarorlar qabul qilinib, ularning ijrosini ta’minlash bo‘yicha mas’ullar belgilandi. Umuman olganda, mazkur Kengash yig‘ilishi universitetda ta’lim sifatini oshirish, boshqaruv tizimini takomillashtirish hamda yangi o‘quv yiliga puxta tayyorgarlik ko‘rishda muhim ahamiyat kasb etdi.